අනුරාධපුර දිස්ත්‍රික්කයේ නිල සෙවණ කාර්යාල 6 ක් හ‌ෙට ජනතා අයිතියට

ස්වදේශ කටයුතු අමාත්‍යාංශයේ මුදල් ප්‍රතිපාදන මත ස්වදේශ කටයුතු අමාත්‍යවරයාගේ සංකල්පයකට අනුව ක‍්‍රියාත්මක ‘‘නිල සෙවණ’’ ව්‍යාපෘතියට සමගාමීව අනුරාධපුර දිස්ත්‍රික්කයේ රාජාංගණය, තලාව, ඉපලෝගම, ගල්නෑව සහ තඹුත්තේගම යන ප්‍රාදේශීය ලේකම් කොට්ඨාශයන්හි ඉදිකළ නිල සෙවණ කාර්යාල 6 ක් ස්වදේශ කටයුතු අමාත්‍ය වජිර අබේවර්ධන මහතාගේ සුරතින් හ‌ෙට (05) ජනතා අයිතියට පත් කිරීමට නියමිතය.

ජනාධිපති මෛත්‍රීපාල සිරිසේන මහතාගේ උපදෙස් මත අග්‍රාමාත්‍ය රනිල් වික්‍රමසිංහ මහතාගේ මගපෙන්වීමෙන් මෙම සංවර්ධන ව්‍යාපෘති ක්‍රියාත්මක කෙරේ.

වේරගල, ඉහළ තලාව, එප්පාවල, කඩියන්ගල්ල, මැදවච්චිය සහ ඉකිරිවැව මෙසේ ජනතා අයිතියට පත් කිරීමට නියමිත නිල සෙවණ කාර්යාල වෙයි. ස්වදේශ කටයුතු අමාත්‍යාංශයේ මුල්‍ය ප්‍රතිපාදන මත 2020 අවසානය වන විට
”නිල සෙවණ” කාර්යාල 14,000 ක් ඉදි කිරීමට නියමිත අතර ඒ මගින් කාර්යක්ෂම, විශ්වාසනීය හා ගුණාත්මක රාජ්‍ය සේවයක් ගමේ ජනතාව අතරට ගෙනයාම සදහා අවස්ථාවක් ලැබෙනු ඇත.

නිල සෙවණ කාර්යාලයක් සඳහා රජය වෙන් කරනු ලබන මුදල රුපියල් ලක්ෂ 20කි.