මිනිස් වෙළදාමේ යෙදෙන විදේශ රැකියා නියෝජිතායතනවලට එරෙහිව නීතිය දැඩිව ක්‍රියාත්මක කරන ලෙස විදුලි සංදේශ, ඩිජිටල් යටිතල පහසුකම් හා විදේශ රැකියා අමාත්‍ය හරින් ප්‍රනාන්දු මහතා සහ නියෝජ්‍ය අමාත්‍ය මනුෂ නානායක්කාර මහතා ශ්‍රී ලංකා විදේශ සේවා නියුක්ති කාර්යංශයට උපදෙස් ලබාදී ඇත.
මේ සම්බන්ධයෙන් කාර්යාංශය චක්‍රලේඛ මඟින් බලපත්‍රලාභී විදේශ රැකියා නියෝජිත ආයතන දැනුවත් කර ඇති අතර එවැනි මිනිස් වෙළදාමේ යෙදෙන විදේශ රැකියා නියෝජිත ආයතනයන්හී බලපත්‍ර අවලංගු කිරීමට ද කටයුතු කරන ලෙස ඒ අනුව නියෝග කර තිබේ.
වංචනික ලෙස අයථා ක්‍රම භාවිතා කරමින් විදේශ රැකියා සඳහා යොමු කර ශ්‍රමය සූරාකෑම “ලිංගික සූරාකෑම හෝ අවයව ලබා ගැනීම සිදු කරයි නම් එය මිනිස් වෙළඳාම යටතට ගැනෙන ශ්‍රී ලංකා දණ්ඩ නීති සංග්‍රහයේ 360 (ඇ) වගන්තියට අනුව බරපතළ දඩුවම් ලැබිය හැකි වරදකි.
කාර්යාංශයේ ස්ථාපිත කර ඇති මිනිස් වෙළදාම මැඩලීමේ ඒකකයට 2018 වසරේ ජනවාරි සිට ඔක්තෝම්බර් දක්වා කාලය තුළ පැමිණිලි 29ක් ලැබී ඇත.
