ශ්‍රි ලංකා පාර්ලිමේන්තු ඉතිහාසය තුළ ජනාධිපතිවරයෙකු පාර්ලිමේන්තුවේ කමිටු රැස්වීමකට එක්වූ පළමු අවස්ථාව ලෙස සටහන් කරමින් පාර්ලිමේන්තුවේ ජාතික ආරක්ෂාව පිළිබඳ ආංශික අධීක්ෂණ කමිටුවේ ප්‍රගති සමාලෝචන රැස්වීමට ජනපති මෛත්‍රීපාල සිරිසේන මහතා ඊයේ (11) පෙරවරුවේදී එක්ව තිබේ.
ත‍්‍රස්තවාදය වැළැක්වීමට අවශ්‍ය නීති සංශෝධනය සහ නව නීති පැනවීම කඩිනම් කිරීමට ජනාධිපතිවරයා මෙහිදී උපදෙස් දී තිබේ.
ජාතික ආරක්ෂාව පිළිබඳ ගතයුතු තීන්දු තීරණ කිසිසේත් ප‍්‍රමාද නොකළ යුතු අතර ඒ වෙනුවෙන් ගතයුතු තීන්දු තීරණ එම මොහොතේදී ම නිසි පරිදි ගැනීම ඉතා වැදගත් බව ජනපතිවරයා මෙහිදී සඳහන් කර තිබේ.
ජාතික ආරක්ෂාව ප‍්‍රධාන තේමාව කර ගනිමින් ආගමන හා විගමන කටයුතු, ත‍්‍රස්තවාදයට මුදල් සැපයීම, වෙබ් ප‍්‍රකාශ සහ අසත්‍ය ප‍්‍රචාර, සයිබර් ආරක්ෂාව, අධ්‍යාපන ක‍්‍රමය ආදි ක්ෂේත‍්‍ර ගණනාවක් පුරා විහිද යන ප‍්‍රධාන අංශ 15ක් යටතේ කරුණු සොයා බැලීම මෙහිදී සිදු කෙරෙයි.
එම වාර්තාව නුදුරේ දී ම පාර්ලිමේන්තුව වෙත භාරදීමට නියමිතය. මෙම කමිටුවේ සභාපතිත්වය පාර්ලිමේන්තු මන්ත්‍රී මලිත් ජයතිලක මහතා විසින් දරනු ලබයි.
