නොරොච්චෝලේ තාප විදුලි බලාගාරය ආශ්‍රිත පාරිසරික, ජනතා ගැටලු ජනපතිගේ අවධානයට

Share

නොරොච්චෝලේ තාප විදුලි බලාගාරය ආශ්‍රිතව මතුව ඇති පාරිසරික සහ ජනතා ගැටලුවලට ස්ථීර විසදුම් දීමට ජනාධිපති ගෝඨාභය මහතා මැදිහත් වී ඇත.

 

තාක්ෂණික ක්‍රමවේද සහ පරිසර නියමයන්ට අනුව තාප බලාගාරයේ ක්‍රියාකාරිත්ව සිදුවිය යුතු බව ජනාපතිවරයා අවධාරණය කරයි.

අගරදගුරු අති උතුම් මැල්කම් රංජිත් කාදිනල් හිමිපාණන් වහන්සේ සහ හලාවත රදගුරු ඇතුළු ප්‍රදේශයේ පූජකතුමන්ලා, ප්‍රදේශවාසීන් සහ පරිසරවේදීන් සමඟ අද (17) ජනාධිපති කාර්යාලයේ පැවති හමුවක දී ජනාධිපති ගෝඨාභය රාජපක්ෂ මහතා මේ බව අවධාරණය කළේය.

ව්‍යාපෘතිය ඇරඹිමේ දී එකඟ වු පරිසර නියමයන් පසුගිය වකවානුවේදී නිසි ලෙස ක්‍රියාත්මක නොකිරීමෙන් පරිසරයට සහ ජනතාවට සිදුව ඇති හානිය ජනාධිපතිවරයාගේ අවධානයට යොමු කෙරිණ.

ව්‍යාපෘතිය භාර සමාගම් සහ බලධාරින් කැඳවා අදාළ උපදෙස් කඩිනමින් දෙන බව ජනාධිපතිවරයා පැවසීය.

නොරොච්චෝලේ දැනට ක්‍රියාත්මක අදියර තුනෙන් මෙගා වොට් 900ක විදුලියක් ජනනය කෙරේ. එහි සිව්වන අදියර පිළිබදව මෙතෙක් තීරණයක් ගෙන නැත.

රටේ වේගවත් සංවර්ධනයකට බලශක්තිය තීරණාත්මක සාධකයකි. එබැවින් විකල්ප බලශක්ති කෙරෙහි කඩිනමින් යොමු වීමේ වැදගත්කම ජනාධිපතිවරයා පැහැදිළි කළේය. විකල්ප බලශක්ති අවම වියදමකින් උත්පාදනය කළ යුතුය.

ඒවා පරිසර සහ ජනතා හිතකාමී විය යුතුය. නොරොච්චෝලේ බලාගාරයේ කටයුතු විමර්ශනයට විදුලිබල අමාත්‍යවරයා, අදාළ ඉංජිනේරුවන් ඇතුළු කණ්ඩායමක් යොමු කරන බව ජනාධිපතිවරයා පැවසීය.

තමා ද බලාගාරය නිරික්ෂණයට පැමිණෙන බව ජනාධිපතිවරයා සඳහන් කළේය.

ආගමික නායකයන්ගේ සහ ප්‍රදේශයේ ජනතාව සමග සාකච්ඡා කර ගැටලු නිරාකරණයට පියවර ගන්නා බව ද රාජපක්ෂ මහතා කියා සිටියේය.

වසර 2030 වන විට රටේ සමස්ත බලශක්ති අවශ්‍යතාවයෙන් 80% පුනර්ජනනීය මූලාශ්‍රවලින් උත්පාදනය කිරීමට අපේක්ෂා කෙරේ. පසුවිපරම අධ්‍යයන අඛණ්ඩව කරන ලෙස උපදෙස් දී ඇත.

සංවර්ධන ක්‍රියාදාමයේ දි දූෂණය සහ අක්‍රමිකතා පිටුදකිමින් විශාල අරගලයක නිරතවීමට ජනාධිපතිතුමාට සිදුව ඇතැයි අගරදගුරු අතිඋතුම් මැල්කම් රංජිත් කාදිනල් හිමිපාණෝ පෙන්වා දුන්හ.

විදෙස් ආයෝජන මත කළ ව්‍යාපෘතිවලදී  පසුගිය සමයේ  සිදුවු අක්‍රමිකතා පිළිබඳව උන්වහන්සේ කණගාටුව පළ කළහ.

Read more

Local News