පැණිබීම සමාගම් සහන ඉල්ලයි – දියවැඩියා රෝගයෙන් මිය යන සංඛ්‍යාව ඉහළ ගොස් ඇත

35
සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතා පවසන්නේ පැණිබීම සමාගම්වල නියෝජිතයින් තමන් හමු වී අයවැය යෝජනා මගින් ක්‍රියාත්මක කළ පැණිබීම බෝතලවල ඇති සෑම සීනි ග්‍රෑම් එකකට සත 50 ක බද්දක් අය කිරීමේ වැඩපිළිවෙළට සහන ලබා දෙන ලෙස පැණිබීම සමාගම් ඉල්ලා ඇතත්, කිසිඳු සහනයක් ලබා නොදෙන බවත්, සහන ලබා දිය යුත්තේ ජනතාවට බවත් සෞඛ්‍ය අමාත්‍යවරයා අනාවරණ කරයි.
බෝ නොවන රෝග පාලනය කිරිම සඳහා පැණිබීම වර්ගවලට වර්ණ සංකේත ක්‍රමයක් පළමුව හදුන්වා දෙන ලදි. ඉන් පසු අයවැය මගින් මෙම යෝජනාව ඉදිරිපත් කළ අතර, එම වැඩපිළිවෙළ අඛණ්ඩව ඉදිරියට ගෙන යන බව සෞඛ්‍ය අමාත්‍යවරයා අවධාරණය කර සිටි. මේ පිළිබඳ ජනතාව දැනුවත් කිරීමේ වැඩපිළිවෙළක් ද ක්‍රියාත්මක කිරීමට සැළසුම් කර ඇත. ලෝක බැංකු ආධාර යටතේ ඒ සඳහා ඇමරිකානු ඩොලර් මිලියන 200 ක මුදලක් ලැබී ඇත.
ලෝක සෞඛ්‍ය සංවිධානයේ වාර්තාවලට අනුව බෝනොවන රෝගවලින් වාර්ෂිකව ලොව පුරා ජනගහනයෙන් සියයට 70 ක් පමණ මිය යන බව අනාවරණ වී තිබේ. ශ්‍රී ලංකාව දෙස බැලීමේ දී දියවැඩියා රෝගයෙන් මිය යන සංඛ්‍යාව ඉහළ ගොස් ඇත. ඒ සඳහා ප්‍රධාන වී ඇත්තේ අධික සීනි පරිභෝජනයයි. ලෝක සෞඛ්‍ය සංවිධානය සඳහන් කරන්නේ වසරක දී ලොව පුරා ලක්ෂ 50 ක් පමණ දියවැඩියා රෝගයෙන් පමණක් මිය යන බවයි. එම නිසා සීනි පරිභෝජනය අවම කිරීමට කටයුතු කරන බවත්, කුමන බලපෑම් එල්ල වුවද එය නතර නොකරන බවත් සෞඛ්‍ය අමාත්‍යවරයා පවසයි.