මහ බැංකු බැඳුම්කර වංචා සිද්ධිය සම්බන්ධයෙන් චෝදනා එල්ල වී සිටින පර්පචුවල් ට්රෙෂරීස් සමාගමේ තත්කාලීන දඩ ගෙවීම් පද්ධති ගිණුමෙන් රුපියල් පහලොස් ලක්ෂ අටදහසක මුදලක් එම සමාගමේ මුදල් ආයෝජනය කළ කාන්තාවක් වෙත මුදාහැරීමට පියවර ගන්නා ලෙස කොළඹ ප්රධාන මහෙස්ත්රාත් ලංකා ජයරත්න මෙනවිය අද (29) ශ්රී ලංකා මහ බැංකුවේ අධිපතිවරයාට නියෝග කර තිබේ.
අදාළ සමාගමේ මුදල් ආයෝජනය කළ එම කාන්තාව සිය නීතිඥවරයා මාර්ගයෙන් අධිකරණය හමුවේ කරුණු දක්වමින් තමන් විසින් අදාළ සමාගමේ සිදුකළ ආයෝජන වෙනුවෙන් රුපියල් පහලොස් ලක්ෂ අටදහසක මුදලක් ලාභාංශ වශයෙන් ලැබීමට නියමිතව තිබෙන බව සඳහන් කළාය.
ඒ අනුව පර්පචුවල් ට්රෙෂරීස් සමාගමේ බැංකු ගිණුම්වලින් තමන්ට හිමි විය යුතු එම මුදල මුදාහරින ලෙස ශ්රී ලංකා මහ බැංකුව වෙත නියෝගයක් නිකුත් කරන ලෙස ද ඇගේ නීතිඥවරයා අධිකරණයෙන් ඉල්ලීම් කළේය.
එම ඉල්ලීමට පර්පචුවල් ට්රෙෂරීස් සමාගමේ සභාපති ජෙෆ්රි ඇලෝසියස් මහතා අධිකරණය හමුවේ පෙනී සිටිමින් මෙම කාන්තාව විසින් ආයෝජනය කළ මුදල් කල්පිරී තිබේ නම්, එය මුදාහැරීම සම්බන්ධයෙන් විරෝධයක් නොමැති බව සිය නීතිඥවරයා මාර්ගයෙන් දැන්විය.
ඒ අනුව අදාළ තැනැත්තිය විසින් ඉල්ලා සිටින මුදල පර්පචුවල් ට්රෙෂරීස් ආයතනයේ තත්කාලීන දඩ ගෙවීම් පද්ධති ගිණුමෙන් මුදාහැරීමට පියවර ගන්නා ලෙස මහෙස්ත්රාත්වරිය විසින් ශ්රී ලංකා මහ බැංකුවේ අධිපතිවරයාට නියෝග කළාය.
අනතුරුව පැමිණිල්ල නොවැම්බර් මස 12 වන දා කැඳවීමට නියම කළ මහෙස්ත්රාත්වරිය එදිනම මෙම බැඳුම්කර වංචා සිද්ධිය සම්බන්ධයෙන් සිදුකරන පරීක්ෂණවල ප්රගතිය වාර්ථා කරන ලෙස ද අපරාධ පරීක්ෂණ දෙපාර්තමේන්තුව ට නියම කළාය.