පූජනීය ස්ථානවල ඓතිහාසික උරුමයට හෝ පුරාවිද්‍යාත්මක දේපලවලට හානි කිරීමට කිසිවෙකුටත් ඉඩ නොතබන බව ජනාධිපති ගෝඨාභය රාජපක්ෂ මහතා අවධාරණය කරයි.
සියලු ඓතිහාසික ස්ථාන ආරක්ෂා කරමින් වෙල්ලස්සේ උරුමය සුරකින වැඩපිළිවෙළක් ඒ වෙනුවෙන් සකස් කරන බව ජනාධිපතිවරයා පැවසීය.
පොදුජන පෙරමුණෙන් මහ මැතිවරණයට තරග වදින අපේක්ෂකයන්ගේ ජයග්‍රහණය තහවුරු කිරීම සඳහා මොණරාගල දිස්‍ත්‍රික්කයේ චාරිකාවක නිරත වෙමින් ජනාධිපති ගෝඨාභය රාජපක්ෂ මහතා මේ බව ප්‍රකාශ කළේය.
වෙල්ලස්සේ පෞරාණික වටිනාකම ඉස්මතුවන ලෙස සංචාරක කර්මාන්තයට විවෘත කිරීමේ ඇති හැකියාව පෙන්වා දුන් ජනාධිපතිවරයා බුදුරුවගල සහ බතලආර වැව ඇතුළු වැව් ප්‍රතිසංස්කරණයෙන් කෘෂිකර්මාන්තයේ දියුණුවට විශාල දායකත්වයක් දිය හැකි බව ද කියා සිටියේය.
වට්ටක්කා සහ කොමඩු ආශ්‍රිත අතුරු නිෂ්පාදන කර්මාන්ත ආරම්භ කිරීමටත්, ගම්මිරිස් හා දොඩම් වගාව ප්‍රවර්ධනයටත් පියවර ගන්නා බව ද ජනාධිපති ගෝඨාභය රාජපක්ෂ මහතා එහිදී ප්‍රකාශ කර තිබේ.
