දුම්රිය දෙපාර්තමේන්තුවට අනුව, අද (20) උඩරට මාර්ගයේ ධාවනය කිරීමට නියමිතව තිබූ දුම්රිය ගමන් වාර 7 ක් අවලංගු කර තිබෙනවා. මෙම තත්ත්වයට හේතු වී ඇත්තේ ඉහළ කෝට්ටේදී දුම්රියක් පීලි පැනීම සහ මාර්ගයේ ප්‍රදේශ කිහිපයකට පස් තට්ටු කඩා වැටීමයි.
මේ හේතුවෙන් දැනට උඩරට මාර්ගයේ දුම්රිය ධාවනය රඹුක්කන දක්වා සීමා කර තිබෙනවා. කෙසේ වෙතත්, මහනුවර සහ බදුල්ල අතර දුම්රිය ධාවනය සුපුරුදු පරිදි සිදුවන බවටයි වාර්තා වන්නේ.
දුම්රිය දෙපාර්තමේන්තුව සඳහන් කළේ, ඊයේ පස්වරුවේ පීලි පැනීමට ලක් වූයේ මහනුවර සිට කොළඹ කොටුව බලා ධාවනය වූ නගරාන්තර සීඝ්‍රගාමී දුම්රිය බවයි. පවතින අධික වර්ෂාව නිසා එම ස්ථානයට ළඟා වීමට ඇති දුෂ්කරතා හේතුවෙන්, පීලිගත කිරීමේ කටයුතු සඳහා යම් දිගු කාලයක් ගතවනු ඇතැයි දෙපාර්තමේන්තුව පවසයි.
අවලංගු කළ ගමන් වාර 7 අතරට, කොළඹ කොටුව සිට මහනුවර, මාතලේ සහ බදුල්ල බලා ධාවනය වීමට තිබූ සීඝ්‍රගාමී දුම්රිය ගමන් වාර 3 ක් සහ මහනුවර, මාතලේ හා බදුල්ල සිට කොළඹ කොටුව හා බෙලිඅත්ත බලා ධාවනය වීමට තිබූ දුම්රිය ගමන් වාර 4 ක් ඇතුළත් වී තිබෙනවා.
මේ අතර, ඊයේ පස්වරුවේ දුම්රියක් පීලි පැනීම, පස් කණ්ඩියක් සහ ගසක් මාර්ගයට කඩා වැටීම හේතුවෙන් අඩාල වී තිබූ කැළණි වැලි මාර්ගයේ දුම්රිය ධාවනයත් මේ වනවිට සාමාන්‍ය තත්ත්වයට පත් කර ඇතැයි වැඩිදුරටත් වාර්තා වනවා.
