සිරිපුර මධ්‍ය මහා විද්‍යාලයේ 10 වසරේ ඉගෙනුම ලබන උපතින්ම අතක් අහිමි එන්. පී. විනීතා දමයන්ති සිසුවිය තමන් වෙත කෘතිම අතක් ලබාගැනීමට සහය වන ලෙස ජනාධිපතිතුමාගෙන් කරන ලද ඉල්ලීම ඉටු කරමින් එම දියණිය වෙත කෘතිම අතක් ලබාදීම අද (03) පෙරවරුවේ ජනාධිපති කාර්යාලයේදී ජනාධිපතිතුමා අතින් සිදුවිය.
2017 වසරේ දෙසැම්බර් 31 වනදා සිරිපුර ප‍්‍රදේශයේ පැවති වැඩසටහනකදී ජනාධිපතිතුමා හමු වූ මෙම දැරිය ජනාධිපතිතුමාගෙන් ඉල්ලා සිටියේ තමන් වෙත කෘතිම අතක් ලබාගැනීමට අවශ්‍ය සහය ලබාදෙන ලෙසයි.
එම අවස්ථාවේම නිලධාරින් වෙත ජනාධිපතිතුමා උපදෙස් දුන්නේ එම දැරියට ගැළපෙන සුදුසු අතක් නිර්මාණය කිරීම සඳහා අවශ්‍ය කටයුතු සොයා බලන ලෙසයි.
ඒ අනුව යුද හමුදාපති ලූතිනන් ජනරාල් මහේ්ෂ් සේනානායක මහතා වෙත කළ දැනුම් දීම පරිදි ශී‍්‍ර ලංකා යුද හමුදාවේ පුනරුත්ථාපන අධ්‍යක්ෂ මණ්ඩලය යටතේ ස්ථාපිත ඝෘජු කාරක හා අංගාදේශක කාර්මිකාගාරයේ මෙම කෘතිම අත නිෂ්පාදන කෙරුණු අතර ඒ සඳහා උපදේශන සහය සහ අමුද්‍රව්‍ය ජර්මන් සමාගමක් මගින් සපයා ගන්නා ලදී.
මෙම කෘතිම අත නිෂ්පාදනය සඳහා රුපියල් ලක්ෂ 02 ක පමණ මුදලක් වැය වී තිබෙන අතර ඒ සඳහා ජනාධිපති අරමුදල මගින් මූල්‍ය ප‍්‍රතිපාදන වෙන් කරනු ලැබීය.