හම්බන්තොට වරායට ප්‍රථම වරට ලෝ බොර නැවක්

41

සිමෙන්ති නිෂ්පාදනයේදී යොදා ගන්නා අතිරේකයක් වන ලෝ බොර මෙට්‍රික් ටොන් 27,150 සහිත ‘ඉතාකා පේෂන්ස්’ නැමැති නෞකාව පසුගියදා හම්බන්තොට ජාත්‍යන්තර වාරයේ නැංගුරම් ලන ලදී .

හම්බන්තොට ජාත්‍යන්තර වාරයේ ප්‍රථම වරට මෙවැනි හැසිරවීමක යෙදුණද, ඉතා උසස් කාර්යක්ෂමතාවයකින් මෙහෙයුම සාර්ථකව අවසන් කිරිමට වරායේ පළපුරුදු සේවක මණ්ඩලයට හැකි වූ බවත් කොතරම් දුරට සාර්ථක වූවද කිවහොත් ඇතැම් දිනවල මෙට්‍රික් ටොන් 11,000 දක්වා ගොඩබෑමේ අගයක් වාර්තා කිරීමට වරාය සේවකයින්  සමත් වූ බව හම්බන්තොට ඉන්ටර්නැෂනල් පොර්ට් ගෲප් සමාගම පවසා සිටියි.

මෙයට පෙර ලෝ බොර, කුඩා යාත්‍රා මඟින් ගාලු වරායට ගෙන ඒම සිදු කෙරිණි.

එහෙත් මෙවැනි විශාල තොග නෞකාවන් හැසිරවීමට, ගාලු වරායේ ඉපිළුම් ගැඹුර ප්‍රමාණවත් නොවන හෙයින්, හම්බන්තොට ජාත්‍යන්තර වරාය විසින් මෙම භාණ්ඩ ගොඩබෑම සාර්ථකව නිමා කල බවද එම සමාගම පෙන්වා දෙයි.

හම්බන්තොට ඉන්ටර්නැෂනල් පොර්ට් ගෲප් සමාගමේ ප්‍රධාන මෙහෙයුම් නිලධාරී තිස්ස වික්‍රමසිංහ මහතා ප්‍රකාශ කළේ, විශාල නෞකා පැමිණිමේ ආර්ථික වාසිය සමඟ කාර්යක්ෂමව ඉහළ මට්ටමේ ඵලදායිතාවයක් ලබා දීම හේතුවෙන්, හම්බන්තොට ජාත්‍යන්තර වරාය දකුණේ ක්‍රියාත්මක වන සිමෙන්ති කර්මාන්තය සඳහා හොඳම විකල්පය බවට පත් වී ඇති බවයි.

මධ්‍යම පරිසර අධිකාරිය නිර්දේශ කර ඇති පරිසර රෙගුලාසි වලට අනුකූලව වරායේ මෙහෙයුම් සිදු කර ඇති බවද ඔහු  වැඩිදුරටත් පැවසීය.