උතුරු නැගෙනහිර සංවර්ධනයට රජය විශාල මුදලක් වැය කළ බව රිෂාඩ් කියයි

උතුරු හා නැගෙනහිර පළාත්වල සංවර්ධන කටයුතු සඳහා වර්තමාන රජය විශාල මුදලක් වැයකල බව කර්මාන්ත හා වාණිජ කටයුතු දිගුකාලීනව අවතැන් පුද්ගලයන් නැවත පදිංචි කිරීම, සමූපකාර සංවර්ධන හා වෘත්තීය පුහුණු හා නිපුණතා සංවර්ධන අමාත්‍ය රිෂාඩ් බදියුදීන් මහතා පැවසීය.

වව්නියාව මහ රෝහලේ වාට්ටු සංකීර්ණය විවෘත්ත කිරීමේ උත්සවයට සහභාගි වෙමින් අමාත්‍යවරයා මේ බව පැවසීය.

මෙම උත්සවය ඊයෙ(14) පැවැති අතර එහි ප්‍රධාන ආරාධිත අමුත්තා ලෙස අග්‍රාමාත්‍ය රනිල් වික්‍රමසිංහ මහතාද, සම්භාවනීය අමුත්තා ලෙස සෞඛ්‍ය පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතා සහභාගිවිය.

අමාත්‍යවරයා එහිදී මෙසේද පැවසීය,

“පසුගිය වසර 04ක කාලය තුළ උතුරු පළාත සඳහා අග්‍රාමාත්‍යතුමාගේ යටතේ ඇති අමාත්‍යාංශය මගින් වෙන්කළ මුදලින් විශාල සංවර්ධන වැඩසටහන් ප්‍රමාණයක් සිදුකළා.

මහජන සුභසාධනය පිළිබඳව විශේෂ අවධානයක් යොමුකරමින් සෞඛ්‍ය, අධ්‍යාපන, නිවාස ඉදිකිරීම්, ඇතුළු යටිතල පහසුකම් රාශීයක් ලබා දීමට වර්තමාන රජය කටයුතු කළා. යුද්ධයෙන් අවතැන්වුවන් වෙනුවෙන්, අඩු ආදායම්ලාබීන් වෙනුවෙන් ප්‍රතිලාබ රැසක් ලබා දීමට කටයුතු කළා.

දරුවන්ගේ පාසල් අධ්‍යාපනය සාර්ථක කර ගැනීම සඳහා දැනට ඉදිකර ඇති නව ගොඩනැගිලි ඉතා කඩිනමින් දරුවන් සතු කිරීමට කටයුතු කරනවා.

උතුරු පළාත් ජනතාවගේ සෞඛ්‍ය නංවාලීම සඳහා වර්ථමාන සෞඛ්‍ය අමාත්‍ය රාජිත සේනාරත්න මැතිතුමා කිහිප අවස්ථාවකදීම මෙහි පැමිණ තිබෙනවා.

මෙතෙක් හිටපු සෞඛ්‍ය අමාත්‍යවරුන්ගෙන් උතුරු පළාතට වැඩිම වාර ගනනක් පැමිණි සෞඛ්‍ය අමාත්‍යවරයා රාජිත සේනාරත්න මැතිතුමයි. ඒ පිළිබදව අපගේ ස්තූතිය එතුමාට හිමි වෙනවා.

උතුරු පළාතේ සංවර්ධනය වෙනුවෙන් ඉතා කැපවීමෙන් කටයුතු කරන අග්‍රාමාත්‍ය රනිල් වික්‍රමසිංහ මැතිතුමාටත්, සෞඛ්‍ය ඇමතිතුමාට උතුරු පළාත් ජනතාවගේ ප්‍රසාදය හිමිවෙනවා” යැයි පැවසීය.