හිටපු අමාත්‍ය පාඨලී චම්පික රණවක, ඔහුගේ රියැදුරු දිලුම් තුසිත කුමාර සහ එවකට වැලිකඩ පොලිස් ස්ථානාධිපතිව සිටි වත්මන් සහකාර පොලිස් අධිකාරී සුදත් අස්මඩල යන අයට එරෙහිව ගොනුකර ඇති නඩුව විභාගය සඳහා නොවැම්බර් මස 18 වැනිදා කැඳවීමට කොළඹ මහාධිකරණය අද (ජූලි 25) නියෝග කළා. නඩුවට අදාළව පාඨලී චම්පික රණවක මහතා ඉදිරිපත් කළ අභියාචනය ශ්‍රේෂ්ඨාධිකරණය විසින් නිෂ්ප්‍රභ කර ඇති බව කොළඹ මහාධිකරණ විනිසුරු සුජීව නිශ්ශංක මහතා අද දැනුම් දුන්නා. ඒ අනුව, ශ්‍රේෂ්ඨාධිකරණයේ නියෝග පරිදි නඩු විභාගය ඉදිරියට පවත්වාගෙන යන බව විනිසුරුවරයා සඳහන් කළා.
නඩු විභාගය සඳහා දිනයක් ලබා දෙන ලෙස පැමිණිල්ල වෙනුවෙන් පෙනී සිටි රජයේ නීතිඥවරයා අධිකරණයෙන් ඉල්ලා සිටි අතර, ඒ අනුව නොවැම්බර් 18 වැනිදාට නඩුව කැඳවීමට නියෝග කළ අධිකරණය, එදිනට සාක්ෂිකරුවන්ට අධිකරණය හමුවේ පෙනී සිටින ලෙස දන්වා සිතාසි නිකුත් කරන ලෙසද නියම කළා.
මේ අතර, විත්තිකාර පාඨලී චම්පික රණවක මහතා වෙනුවෙන් පෙනී සිටි ජනාධිපති නීතිඥ සරත් ජයමාන්න මහතා අධිකරණයෙන් ඉල්ලා සිටියේ, තම සේවාදායකයාට පනවා ඇති විදේශ ගමන් තහනම මීළඟ නඩු දිනය දක්වා තාවකාලිකව ඉවත් කරන ලෙසයි. සම්මන්ත්‍රණයක් සඳහා විදේශගත වීමටත්, ඕස්ට්‍රේලියාවේ සිටින දියණිය බැලීමට යාමටත් අවශ්‍ය බව පෙන්වා දුන් ජනාධිපති නීතිඥවරයා, මීට පෙරද අධිකරණ අවසරය මත විදේශගත වූ විත්තිකරු නිසි පරිදි යළි දිවයිනට පැමිණ නඩු විභාග සඳහා පෙනී සිටි බවද සිහිපත් කළා.
ඒ අනුව, පාඨලී චම්පික රණවක මහතාට පනවා තිබූ විදේශ ගමන් තහනම තාවකාලිකව ලිහිල් කිරීමට මහාධිකරණ විනිසුරුවරයා නියම කළ අතර, ඒ බව ආගමන හා විගමන පාලකවරයාට දැනුම් දෙන ලෙසද නියෝග කළා. 2016 පෙබරවාරි 28 වැනිදා රාජගිරිය ප්‍රදේශයේදී තරුණයෙකු බරපතළ අනතුරකට ලක් කිරීම සහ ඊට අදාළ සාක්ෂි වසන් කිරීම ඇතුළු චෝදනා යටතේ නීතිපතිවරයා විසින් මෙම නඩුව ගොනුකර තිබෙනවා.
