දිවයින පුරා පවතින අයහපත් කාලගුණික හා ආපදා තත්ත්වය හේතුවෙන් බාධාවට ලක්ව ඇති දුරකථන හා අන්තර්ජාල සන්නිවේදන ජාල කඩිනමින් යථා තත්ත්වයට පත් කිරීම සඳහා ගත යුතු විශේෂ ක්‍රියාමාර්ග පිළිබඳ රජය සහ ප්‍රධාන පෙළේ විදුලි සංදේශ සමාගම් අතර සාකච්ඡාවක් අද (29) විදුලි සංදේශ නියාමන කොමිෂන් සභාවේදී පැවැත්වුණා. ජනාධිපති ලේකම් කාර්යාලය , “ක්ලීන් ශ්‍රී ලංකා” (Clean Sri Lanka) ලේකම් කාර්යාලය, ඩිජිටල් අමාත්‍යාංශය සහ විදුලි සංදේශ නියාමන කොමිෂන් සභාව (TRCSL) එක්වයි මෙම සාකච්ඡාව සංවිධානය කර තිබුණේ.
විදුලිය ඇනහිටීම හා ජාල බිඳවැටීම් නිසා ආපදාවට ලක්වූ ප්‍රදේශවල ජනතාවට සිය ඥාතීන් සම්බන්ධ කර ගැනීමට නොහැකි වීම පිළිබඳවත් මෙහිදී අවධානය යොමු කෙරුණා. ආපදා අවස්ථාවලදී ජාල තදබදය අවම කරමින් හදිසි ඇමතුම් ( Emergency Call) සඳහා ප්‍රමුඛතාවය ලබාදීමටත් මෙහිදී ක්‍රියාකරුවන් තම එකඟතාවය පළ කළ අතර මෙම ගැටලු විසඳීමට රජයේ පූර්ණ මැදිහත්වීම ලබා දෙන බවට ඩිජිටල් ආර්ථික නියෝජ්‍ය අමාත්‍ය එරංග වීරරත්න මෙහිදී අවධාරණය කළා.
