ප්‍රංශ ජනාධිපති Emmanuel Macron මහතා, පසුගිය දිනවල පැවති විශාල විරෝධතා කැරලි සහ කොල්ලකෑම් දක්වා වර්ධනය වීමෙන් පසු ජනතාවගෙන් “සන්සුන්ව හා සාමකාමීව කටයුතු කරන ලෙස” ඉල්ලා තිබේ. ඊයේ (18) දිනයේදීත් Paris නගරයේ ඇතැම් ප්‍රදේශවල නොසන්සුන්කාරී තත්ත්වයන් පැවතුණි.
Élysée Palace හි සිට ජාතිය අමතමින් Macron මහතා, විරෝධතාවලට සහභාගී වූවන්ගෙන් තත්ත්වය තවදුරටත් උග්‍ර නොකරන ලෙස ඉල්ලා සිටියේය. ඉන්ධන මිල ඉහළ යාම, ජීවන වියදම වැඩිවීම සහ පාසල් ඇතුළු රාජ්‍ය සේවාවල තත්ත්වය පිරිහීම සම්බන්ධයෙන් විරෝධය පළ කරමින් පුද්ගලයන් 550,000ක් පමණ වීදිවලට එක්වී තිබුණි. බොහෝ විරෝධතා සාමකාමීව පැවතියද, පසුව ඇතැම් ස්ථානවල ඒවා ප්‍රචණ්ඩකාරී තත්ත්වයට පත්විය. ප්‍රංශ අභ්‍යන්තර කටයුතු අමාත්‍යාංශයට අනුව, පොලිසිය පුද්ගලයන් 2,400ක් පමණ අත්අඩංගුවට ගෙන තිබේ.
“කිසිම දෙයකින් මේ අසීමිත ප්‍රචණ්ඩත්වය සාධාරණීකරණය කළ නොහැකියි,” යනුවෙන් ජනාධිපතිවරයා පැවසූ අතර, ඊට සම්බන්ධ පුද්ගලයන්ට එරෙහිව නීතිය ක්‍රියාත්මක කරන බවද සඳහන් කළේය.
Limoges නගරයේ 19 වැනි සියවසට අයත් අලංකාර නගර ශාලාවට ද කැරලිකරුවන් විසින් ඇති කළ ගින්නකින් දැඩි හානි සිදුවිය. ගින්න පැතිරීමත් සමඟ එහි ඔරලෝසු කණුව සහ වහලය කඩා වැටී ගොඩනැගිල්ලේ විශාල කොටසක් විනාශ විය.
