බදියුදීන් අභියාචනාධිකරණයට ඉදිරිපත් කළ පෙත්සම

මන්ත්‍රී රිෂාඩ් බදියුදීන් මහතාව අත්අඩංගුවට ගැනීම වළකන ලෙස ඉල්ලා ඔහුගේ නීතිඥවරුන් අභියාචනාධිකරණයට රිට් පෙත්සමක් ඉදිරිපත් කර තිබෙන බව වාර්තා වෙයි.

අපරාධ පරීක්ෂණ දෙපාර්තමේන්තුව විසින් තම සේවාදායකයාව අත්අඩංගුවට ගැනීම උත්සහ කරන බව අදාල නීතිඥවරුන් සදහන් කරම්න් මෙම පෙත්සම ඉදිරිපත් කර තිබේ.

එම පෙත්සමේ වගඋත්තරකරුවන් ලෙස වැඩ බලන පොලිස්පති සී.ඩී. වික්‍රමරත්න, අපරාධ පරීක්ෂණ දෙපාර්තමේන්තුව භාර නියෝජ්‍ය පොලිස්පති එස්.පී. රණසිංහ, විමර්ශන සිදුකරන උප පොලිස් පරීක්ෂක ගාමිණී ඇතුළු හත් දෙනෙකු නම් කර තිබෙන අතර පෙත්සම්කාර රිෂාඩ් බදියුදීන් මහතා පවසන්නේ ඉකුත් ජනාධිපතිවරණය දිනයේ දී අවතැන්වූ ඡන්දදායකයින් පුත්තලමේ සිට මන්නාරම දක්වා ප්‍රවාහනය කිරීම තුළින් රජයේ අරමුදල් සාවද්‍ය ලෙස පරිහරණය කළැයි කියන සිද්ධියක් සම්බන්ධයෙන් අපරාධ පරීක්ෂණ දෙපාර්තමේන්තුව විසින් පොදු දේපළ පනත යටතේ තමන්ව අත්අඩංගුවට ගැනීම සඳහා සොයමින් සිටි.

එම සිද්ධිය සම්බන්ධයෙන් අධිකරණයට කරුණු වාර්තා කර තමා අත් අඩංගුවට ගැනීම සඳහා වරෙන්තුවක් ලබා ගන්නා ලෙස නීතිපතිවරයා විසින් පෙරේදා (13) අපරාධ පරීක්ෂණ දෙපාර්තමේන්තුවට උපදෙස් ලබා දී තිබූ බව පෙත්සම්කරු පවසයි.

ඒ අනුව අපරාධ පරීක්ෂණ දෙපාර්තමේන්තුවේ නිලධාරීන් කොළඹ කොටුව මහෙස්ත්‍රාත් අධිකරණයට කරුණු වාර්තාකර වරෙන්තුවක් ලබා ගැනීමට ඉල්ලීම් කළද මහේස්ත්‍රාත්වරයා විසින් වරෙන්තුවක් නිකුත් කිරීම ප්‍රතික්ෂේප කොට ඇතැයි රිෂාඩ් බදියුදීන් මහතා සිය පෙත්සමෙන් පෙන්වා දෙයි.

පෙත්සම්කාර රිෂාඩ් බදියුදීන් මහතා පෙන්වා දෙන්නේ එම සිද්ධිය සම්බන්ධයෙන් තමාට එරෙහිව පොදු දේපළ පනත යටතේ චෝදනා එල්ල කිරීම සඳහා කිසිදු පදනමක් නොමැති අතර අභ්‍යන්තර අවතැන් වූ ඡන්දදායකයින් ප්‍රවාහනය කිරීම සිදු කරනු ලැබුවේ අවතැන්වූවන් පිළිබඳ ව නැවත පදිංචි කිරිමේ ව්‍යාපෘතිය යටතේ පවතින ප්‍රතිපාදන යොදාගනිමින් යැයි ඔහු පෙන්වා දෙයි.