දුම්රිය වෘත්තීය සමිති කිහිපයක් විසින් ඊයේ (08) සවස දියත් කරන ලද හදිසි වැඩ වර්ජනය මෙරට වෘත්තිය සමිති ඉතිහාසයේ කළු පැල්ලමක් ලෙස හැඳින්විය හැකිය.
සේවය නිම වී නිවෙස් බලා යන දස දහස් ගණනක් මගීන් මෙන්ම මේ දිනවල අපොස උසස් පෙළ විභාගයට මුහුණ දෙන සිසු සිසුවියන් විශාල පිරිසක් ද මෙම හදිසි එමෙන්ම අනපේක්ෂිත වැඩ වර්ජනය නිසා අපහසුතාවට පත් වූ බව අමුතුවෙන් කිව යුතු නැත.
ඊයේ දිනයේ මෙම වෘත්තීය සමිති පෙන්නුම් කළේ අන් කිසිවක් නොව ‘වෘත්තීය සමිති ත්රස්තවාදයයි. එනම් වෘත්තීය සමිතිවල පටු අරමුණු සමාජයේ අන් සියලුම දේට වඩා ඉහළින් සළකන, තමන්ගේ වුවමනා හැරෙන්නට අන් සියල්ලන්ගේම වුවමනා එපාකම් වැදගත් නැතැයි සිතන නිර්ලජ්ජිත, කුහක මානසිකත්වයයි.
අප රටක් වශයෙන් එකතු වී, තිස් වසරක් තිස්සේ ම මෙරට විනාශ මුඛයට ඇද දැමූ බෙදුම්වාදී ත්රස්තවාදය පරාජය කළ ආකාරයටම මෙම වෘත්තීය සමිති ත්රස්තවාදය මතවාදීමය වශයෙනුත් ප්රායෝගික තලයේත් පරාජය කිරීමට කාලය එළඹ ඇත.
වෘත්තීය සමිති සහ ඔවුන්ගේ අයිතිවාසිකම්වලට අප උපරිමයෙන් ගරු කරන අතර වෘත්තීය සමිතිවලද වගකීම වන්නේ සදාචාරමය සහ ආචාර ධර්මික රාමුවක් තුළ සිය කටයුතු සිදු කිරීමයි.
ප්රජාතන්ත්රවාදය සහ මානව හිමිකම් ආරක්ෂා කිරීම උදෙසා අප රජයට ඇති කැපවීම දුර්වලකමක් සේ සැලකිය නොයුතු අතර මෙම වෘත්තීය සමිති ත්රස්තවාදය පරාජය කොට ජනජීවිතය යථා තත්ත්වයට ගෙන ඒමට අප උපරිමයෙන් කැප වන බව ද අවධාරණය කළ යුතුය. ඒ සඳහා රජයට උපරිම සහයෝගය ලබා දෙන ලෙස අප ජනතාවගෙන් ද ඉල්ලා සිටිමු.