අගමැති රනිල් තවත් හමුවක

චීන කොමියුනිස්ට් පක්‍ෂය සහ එක්සත් ජාතික පක්‍ෂය අතර ඇති සමීප සබඳතාවය, දෙරට අතර මිත්‍රත්වය වර්ධනය කිරීමටත්, ශක්තිමත් කිරීමටත් පාදක වූ බව ශ්‍රී ලංකා අග්‍රාමාත්‍ය රනිල් වික්‍රමසිංහ සහ චීන කොමියුනිස්ට් පක්‍ෂ දේශපාලන මණ්ඩල සභික සහ චොංඡිං නාගරිකයේ කොමියුනිස්ට් පක්‍ෂ ලේකම් චෙන් මිනර් මහතා අතර පැවති සාකච්ඡාවේ දී අවධාරණය කෙරිණි.

චීන කෙමියුනිස්ට් පක්‍ෂයේ හා කොමියුනිස්ට් පක්‍ෂ අන්තර්ජාතික දෙපාර්තමේන්තුවේ නියෝජිත පිරිසක් අද (18) පෙරවරුවේ කොළඹ අරලියගහ මන්දිරයේ දී ශ්‍රී ලංකා අග්‍රාමාත්‍යවරයා හමුවූ අතර, ශ්‍රී ලාංකේය ජනතාව වෙත චීන ජනතාවගේ සහෘද සුබ පැතුම් එහිදී පිරිනැමිණි.

ජනාධිපති ෂි ජින් පිං ගේ සංකල්පයක් අනුව ක්‍රියාත්මක කෙරෙන ‘එක් මාවතක් – එක් තීරයක්’ වැඩ පිළිවෙලෙහි සාමාජිකයෙක් ලෙස ශ්‍රී ලංකාවේ කාර්යභාරය අගය කළ චෙන් මිනර් මහතා කාර්මික හා කෘෂි කාර්මික නිෂ්පාදන ඇතුළු ක්ෂේත්‍ර ගණනාවක ආයෝජනය කිරීම සඳහා චොංඡිං නාගරිකයේ ආයතන සූදානමින් සිටින බව ද පැවසීය.

චොංඡිං නාගරිකය හා ශ්‍රී ලංකාව අතර ආර්ථික හා වෙළඳ සබඳතා ශක්තිමත් කරලීමේ අවකාශයන් පිළිබඳව ද මෙහිදී සාකච්ඡා කෙරිණි.

ගෝලීය ආර්ථික බලය ආසියාව වෙත කේන්ද්‍රවෙමින් පවතින බව පෙන්වා දුන් ශ්‍රී ලංකා අග්‍රාමාත්‍ය රනිල් වික්‍රමසිංහ මහතා, අනාගත ආසියානු අභියෝග පිළිබඳව සැලකිල්ලෙන් අවධානය යොමු කළ යුතු කාලය එළැඹ ඇති බව පෙන්වා දුන්නේය.

ඉන්දීය සාගර කලාපය ආසන්න රටවල් ජනගහන හා ආර්ථික දෙඅංශයන්ගෙන්ම වැඩි වර්ධනයක් පෙන්වමින් සිටින බැවින්, එකී කලාපීය රටවල වෙළඳපොළ අවශ්‍යතා සම්බන්ධව අවධානය යොමු කළ යුතු බව ද වික්‍රමසිංහ මහතා පෙන්වා දුන්නේය.  ඉන්දීය සාගර කලාපයේ තිරසර සාමය ස්ථාවර කරලීම සම්බන්ධයෙන් ද මෙහිදී අදහස් හුවමාරු කර ගැනිණි.

ශ්‍රී ලංකා අග්‍රාමාත්‍ය රනිල් වික්‍රමසිංහ මහතා පෙන්වා දුන්නේ ආර්ථික වර්ධනය, සමාජ සහ සංස්කෘතික ප්‍රවර්ධනය, අන්තර් පුද්ගල සබඳතා සහ ගෝලීය ස්ථාවරත්වය යන ක්ෂේත්‍රයන් ශක්තිමත් කරලීම සම්බන්ධයෙන් වැඩි අවධානයක් යොමු කරලීම සුදුසු බවය.

සමාජ මාධ්‍ය අභිමුවෙහි දේශපාලන පක්‍ෂ කාර්යයන් ප්‍රසාරණය කරලීමේ නූතන අභියෝගයන් පිළිබඳව ද මේ සාකච්ඡාවේ දී අවධාරණය යොමු කෙරිණි.

පක්‍ෂ ක්‍රියාකාරීන් පුහුණු කිරීම, සාමාජිකයන් බලසතු කිරීම, සාමාජිකත්වය අතරේ පුද්ගල සබඳතාවන් ශක්තිමත් කිරීම ආදී කටයුතුවල දී කොමියුනිස්ට් පක්‍ෂයේ සහය ලබා දීමට තමන් සූදානම් බව ද චෙන් මහතා පැවසීය.

එසේම ශ්‍රී ලංකාවේ ජනතාව වෙත උපරිමයෙන් සහය ලබා දීමට හැම විටම ක්‍රියා කරන බව ද චෙන් මහතා අවධාරණය කළේය.

චීන කොමියුනිස්ට් පක්‍ෂ අන්තර් ජාතික දෙපාර්තමේන්තුවේ නියෝජ්‍ය අමාත්‍ය ගව් යෙඡූ, චොංඡිං නියෝජ්‍ය නගරාධිපති හා චොංඡිං නාගරික ස්ථාවර කමිටු සාමාජික වූ කන්රොං, චොංඡිං නාගරිකයේ කමියුනිස්ට් පක්‍ෂ මහලේකම් වං ෆූ, ශ්‍රී ලංකාවේ චීන තානාපති චෙං ෂුයෙයුවාන් ඇතුළු චොංඡිං නාගරිකය හා චීන කොමියුනිස්ට් පක්‍ෂ අන්තර් ජාතික දෙපාර්තමේන්තුවේ නියෝජිත මහත්ම මහත්මීන් චීනය නියෝජනය කරමින් මේ අවස්ථාවට එක්වූහ.

ප්‍රාථමික කර්මාන්ත සහ සමාජ සවිබලගැන්වීම් අමාත්‍ය දයා ගමගේ, එක්සත් ජාතික පක්‍ෂ යොවුන් පෙරමුණු සභාපති පාර්ලිමේන්තු මන්ත්‍රී දොස්තර කාවින්ද ජයවර්ධන, පාර්ලිමේන්තු මන්ත්‍රී සන්දීප් සමරසිංහ, අග්‍රාමාත්‍ය ලේකම් සමන් ඒකනායක, චීනයේ ශ්‍රී ලංකා තානාපති ආචාර්ය කරුණාසේන කොඩිතුවක්කු සහ අග්‍රාමාත්‍ය අතිරේක ලේකම් සමන් අතාවුදහෙට්ටි මහත්වරු ශ්‍රී ලංකාව නියෝජනය කළහ.