ඉකුත් රජය විසින් අහෝසි කළ ණය යෝජනා ක්‍රම හේතුවෙන් අපහසුතාවට පත් ජනතාවට සහන ලබා දීම සඳහා මහ බැංකුව ප්‍රමුඛ රාජ්‍ය හා පෞද්ගලික බැංකු ඒකාබද්ධව වාර්තාවක් කැඳවා ඇතැයි සංවර්ධන බැංකු සහ ණය යෝජනා රාජ්‍ය අමාත්‍ය ෂෙහාන් සේමසිංහ මහතා පවසයි.
අද (02) සිය අමාත්‍යධුරයේ වැඩ භාරගැනීමේ අවස්ථාවේදි මාධ්‍ය අමතමින් රාජ්‍ය අමාත්‍යවරයා මේ බව සඳහන් කළේය.
ජනාධිපතිවරයා විසින් පත් කරනු ලැබු භාරකාර ආණ්ඩුවේ සංවර්ධන බැංකු සහ ණය යෝජනා රාජ්‍ය අමාත්‍ය ධූරයේ දිවුරුම් දුන් ෂෙහාන් සේමසිංහ මහතා අද පෙරවරුවේ සිය අමාත්‍ය ධුරයේ වැඩ භාර ගත්තේය.
එහිදී වැඩිදුරටත් අදහස් දක්වමින් රාජ්‍ය අමාත්‍ය ශෙහාන් සේමසිංහ මහතා මේ බව පැවසීය.
“අපි දුටුවා මීට පෙර පැවැති රජය අසාර්ථක වීමට ප්‍රධානතම හේතුව වුණේ නිසි වැඩපිළවෙළක් නොමැති වීම. නමුත් අපි බලයට පත් වුණේ ඉතා පැහැදිලිව අපි කරන්නෙ මොකක් ද කියල ප්‍රතිපත්ති ප්‍රකාශයක් ජනතාවට ඉදිරිපත් කරල. ඒ ප්‍රතිපත්ති ප්‍රකාශයට අනුව තමයි අපි කටයුතු කරන්නෙ.
ඒ වගේ ම ජනාධිපතිතුමා, අගමැතිතුමා ඇතුළු අපි සියලු දෙනා මෙම ප්‍රතිපත්ති ප්‍රකාශයේ ඇති සියලුම පොරොන්දු වර්ෂ පහක කාලය තුළ ඒ ආකාරයෙන් ම ඉටු කරන්න බැඳිල ඉන්නවා. ඒ වෙනුවෙන් අපට ඉතිහාසයේ සුවිශේෂ ජනවරමක් ලැබිල තියෙනවා. ඒ වගේ ම සුවිශේෂී නායකත්වයක් ලැබිල තියෙනවා.
අපි අගමැතිතුමාගේ ප්‍රධානත්වයෙන් මහ බැංකුව, රාජ්‍ය සහ පෞද්ගලික බැංකු ප්‍රධානීන් සමග විශේෂ සාකච්ඡාවක් පසුගිය දා පැවැත්වුවා. එහි අරමුණ වුණේ ඉදිරි ආයෝජන අවස්ථා සකස් කර ගැනීම සඳහා එම බැංකුවල පවතින ආර්ථික තත්ත්වය සොයා බැලීමයි. ඒ අනුව ඔවුන් ඉදිරි සතිය තුළ වාර්තාවක් ලබා දෙයි.
විශේෂයෙන් ම අද සුළු හා මධ්‍ය පරිමාණ ව්‍යාපාරිකයන්ගේ ඉඳල මහා පරිමාණ ව්‍යාපාරිකයන් දක්වා ඇති වෙලා තියෙන පීඩනය සැහැල්ලු කරන්න අවශ්‍ය මොනවද කියල අපි එම බැංකුවලින් වාර්තාවක් ඉල්ලල තියෙනවා. ණය තොරතුරු කාර්යාංශය මගින් ඇතැම් ව්‍යාපාරිකයන් අසාදු ලේඛන ගත කරල තියෙනවා.
ව්‍යාපාරිකයන්ට තමන්ගෙ දේපොළ අහිමිවීමේ අවධානමක් තියෙනවා. සතියක වගේ කාලයක් ඇතුළත පෙර කී වාර්තා ලැබුණු වහාම අපි මේ ව්‍යාපාරිකයන්ට අවශ්‍ය සහන ලබා දෙන්න කටයුතු කරනවා.
ඒ වගේම 2014 ඉඳල 2019 දක්වා කාලය තුළ බදු දෙගුණ වෙලා තියෙනවා. එහෙම කරල ලබා ගත්ත බදු මුදලත් හරියට ජනතාව සේවය වෙනුවෙන් ගලාගෙන ගියේ නෑ. වංචා දූෂණ නිසා ඒක අපට අහිමි වෙලා ගියා. අපි පළමු පියවර විදියට බදු බර අඩු කළා. ඒ අඩු කිරීම් නිසා අහිමි වෙන ආදායම ලබා ගැනීමේ පියවරක් විදියට රජයේ වියදම් අඩු කිරීමට අපි පියවර අරගෙන තියෙනවා.
අපි සියලුම ව්‍යවසායකයන්ට ආරාධනා කරනවා ඔබේ ව්‍යාපාර කටයුතු කරගෙන යන්න. අපට ඉදිරියේ දී ආයෝජන අවස්ථා රැසක් ලැබෙයි. දේශීය වගේ ම විදේශීය ආයෝජකයන්ට දිරි දෙන ආකාරයේ ආයෝජන ප්‍රතිපත්ති අපි හඳුන්වා දීල තියෙනවා.
විවිධ මූල්‍ය ආයතන කඩා වැටීම් වගේම ඇතැම් මූල්‍ය ආයතනවල අයථා කටයුතු හේතුවෙන් පීඩාවට වගේම මුලාවට පත් වුණ ගනුදෙනුකරුවන් සම්බන්ධයෙන් අපි දන්නවා. ඔවුන් සමග සාකච්ඡා කරල රටේ ආර්ථිකයටත් හානි නොවෙන, ගනුදෙනුකරුවන්ටත් හානියක් නොවන ආකාරයෙන් එම ගැටලුව විසඳන්න බලාපොරොත්තු වෙනවා.
ඒ වගේම මේ අයථා ලෙස කටයුතු කර ඇති මූල්‍ය ආයතන හා හිමිකරුවන්ට එරෙහිව නීතිය ක්‍රියාත්මක කරන්න හැකි ආකාරයේ වටපිටාවක් සකස් කිරීමටත් අපි කටයුතු කරනවා.
2014 වෙද්දි 6.8% තිබුණ ආර්ථික වර්ධන වේගය අද වෙන විට 1.6%ට අඩු වෙලා තියෙනවා. ආයෝජකයන් අධෛර්යමත් වෙලා තියෙනවා. මේ ආර්ථිකය අපි ප්‍රකෘතිමත් කළ යුතුයි. විශේෂයෙන් ම ජාතික ආරක්ෂාව ශක්තිමත් කිරීම පළමු කටයුත්තයි. ආරක්ෂාව තහවුරු කළාට මදි ආරක්ෂාව තහවුරු වී ඇති බව ජනතාවට ඒත්තු ගැන්වෙන්න ඕනෙ.
ආරක්ෂාව පිළිබඳ ගැටලුවට ස්ථිර විසඳුමක් ලැබුණට පස්සෙ තමයි ආයෝජනයට සුදුසු පරිසරයක් නිර්මාණය වෙන්නෙ. ඊට පස්සෙ තමයි ආර්ථික ගැටලුව විසඳන්න ඕනෙ. මේ ගැටලු දෙක තමයි අපේ රජයක් විදියට ප්‍රමුඛතාවයෙන් විසඳන්න බලාපොරොත්තු වෙන්‌නේ.
ක්ෂුද්‍ර මූල්‍ය ණය කපා හැරීම සම්බන්ධයෙන් ජනාධිපති ගෝඨභය රාජපක්ෂ මහතා ජනාධිපතිවරණ වේදිකාවෙදි පොරොන්දුවක් ලබා දුන්නා. ඒක ප්‍රතිපත්ති ප්‍රකාශයටත් ඇතුළත් කරල තියෙනවා. ඒ නිසා ක්ෂුද්‍ර මූල්‍ය ණය විතරක් නෙවෙයි ගොවි ණය ඇතුළු ණය වර්ග කපා හැරීම සම්බන්ධයෙනුත් අපි කටයුතු කරනවා. මම මුලින් කියපු බැංකු වාර්තා ලැබුණට පස්සෙ ඒ පිළිබඳ අපි ඉදිරි පියවර ගන්නවා.”
