පසුගියදා රත්තොට ඔරලෝසු කණුව අසලදී ප්‍රදේශවාසීන් එක්ව නිහඬ විරෝධතාවයක් පැවැත්වුවා. ඒ ලෝක උරුම නකල්ස් රක්ෂිත භූමියට පිවිසෙන මාර්ගය කලක් තිස්සේ දැඩි ලෙස අබලන්ව ඇති බව පවසමින්.
ප්‍රදේශවාසීන් පෙන්වා දුන්නේ මාර්ගයේ අබලන්භාවය සංචාරක කර්මාන්තයට, ව්‍යාපාර කටයුතුවලට, දෛනික කාර්යයන්ට මෙන්ම ජීවිතවලටද අවධානම් තත්වයක් ගෙන දී ඇති බවයි.
අප මෙම පුවත වාර්තාකර තෙදිනක් ගත වන්නටත් මත්තෙන්, මෙම මාර්ගය ජීවිතයක් බිලිගෙන අවසන්.
රිවස්ටන් මාර්ගයේ ගෝනමඩු ප්‍රදේශයේදී මෙම අනතුර සිදුව තිබුනේ. මාර්ගයේ ගමන් ගත් මෝටර් රථයක් ප්‍රපාතයකට පෙරලී මෙම අනතුර සිදුවුණා.
අනතුරින් මාතලේ උකුවෙල ප්‍රදේශයේ පදිංචි එක්දරු මවක් ජීවිතක්ෂයට පත්ව ඇති බවයි වාර්තා වුනේ.
තවත් තිදෙනෙකු තුවාල ලබා ඇති අතර ඔවුන් ප්‍රතිකාර සඳහා මාතලේ දිස්ත්‍රක් රෝහලට ඇතුලත් කර තිබෙනවා.
අපේ රටේ නිලධාරීන්ගේ ඇස් ඇරෙන්නේම කිසියම් විනාශයක් සිදුවීමෙන් පසුවයි. රිවස්ටන් මාර්ගයේ අනතුරුදායක බව කොතරම් බලධාරීන්ට කිව්වත් ඊට ඇහුම්කන් නොදුන්නේ මෙවැනි අපරාධයක් සිදුවන තුරුද?
තවත් ජීවිත බිලි ගන්නට කලින් අබලන් වී ඇති මෙම මාර්ගය පිළිසකර කිරීමට වගකිවයුතු සියලු බලධාරීන්ගේ අවධානය යොමු වීම අත්‍යවශ්‍යයි.
