චීන ජනාධිපති ෂී ජින් පිං ඊයේ (24) පස්වරුවේ බෙයිජිංහි මහජන මහා ශාලාවේදී ජෝර්දානයේ දෙවන අබ්දුල්ලා රජු සමග සාකච්ඡාවක් පැවැත්විය. රාජ්ය සංචාරයක් සඳහා ජෝර්දාන රජු චීනයට පැමිණ සිටී.
සංකීර්ණ හා අස්ථාවර ජාත්යන්තර හා කලාපීය තත්ත්වයන් හමුවේ, වඩාත් අර්ථවත් හා ගතික චීන-ජෝර්දාන සම්බන්ධතාවයක් ගොඩනැගීම දෙරට ජනතාවගේ පොදු අපේක්ෂාවන්ට අනුකූල වන අතර “ගෝලීය දකුණේ” එකමුතුකම සහ ස්වශක්තිය වර්ධනය කිරීමේ ප්රවණතාවයට ද අනුකූල වන බව ෂී ජින් පිං එහිදී පෙන්වා දුන්නේය. කලාපය තුළ ජෝර්දානය ඉටු කරන අද්විතීය හා වැදගත් කාර්යභාරය චීනය අගය කරන බවත්, එහි ජාතික ස්වෛරීභාවය, ආරක්ෂාව සහ සංවර්ධන අවශ්යතා ආරක්ෂා කිරීම සඳහා චීනය ජෝර්දානයට ස්ථිර ලෙස සහාය ලබා දෙන බවත් ඔහු අවධාරණය කළේය.
ජෝර්දානය සමග එක්ව ගෝලීය මුලපිරුම් හතර ක්රියාත්මක කිරීමටත්, එක්සත් ජාතීන්ගේ සංවිධානය හරය කරගත් ජාත්යන්තර පද්ධතිය සහ ජාත්යන්තර නීතිය මත පදනම් වූ ජාත්යන්තර පිළිවෙල ඒකාබද්ධව ආරක්ෂා කිරීමටත්, පොදු ඉරණමක් සහිත මානව ප්රජාවක් ගොඩනැගීම ප්රවර්ධනය කිරීමටත් චීනය කැමැත්තෙන් සිටින බව ෂී ජින් පිං පැවසීය.
ජෝර්දානය එකම චීනය යන ප්රතිපත්තියට තදින් අනුගත වන බවත්, තායිවානය චීන භූමියේ අනිවාර්ය කොටසක් ලෙස සලකන බවත් දෙවන අබ්දුල්ලා රජු ප්රකාශ කළේය. චීනය සමග ඇති සබඳතාවලට ජෝර්දානය විශාල වැදගත්කමක් ලබා දෙන බවත්, විවිධ ක්ෂේත්රවල චීනය සමග සහයෝගීතාව සහ හුවමාරු ශක්තිමත් කිරීමට කැපවී සිටින බවත්, ජෝර්දානයේ ආයෝජනය කර පොදු සංවර්ධනය හා සමෘද්ධිය අත්කර ගැනීමට පැමිණෙන චීන සමාගම් සාදරයෙන් පිළිගන්නා බවත් ඔහු පැවසීය. එමෙන්ම, ෂී ජින් පිං විසින් යෝජනා කළ ගෝලීය මුලපිරුම් හතර ජෝර්දානය බෙහෙවින් අගය කරන චීනය, ලෝකය වෙනුවෙන් වඩාත් වැදගත් නායකත්ව කාර්යභාරයක් ඉටු කරනු ඇතැයි අපේක්ෂා කරන බවත් ඔහු පැවසීය.
