ඊයේ දින සිට යළිත් විදුලි කප්පාදුව ආරම්භ වුණා. අපොස උසස් පෙළ විභාගය පැවැත්වෙන කාලසීමාව තුළ විදුලිය කප්පාදු කිරීම වැළැක්වීමේ නියෝගයක් ලංකා විදුලිබල මණ්ඩලය ඇතුළු වගඋත්තරකරුවන් වෙත නිකුත් කරන ලෙස කෙරුණු ඉල්ලීමක් ශ්‍රේෂ්ඨාධිකරණය ඊයේ ප්‍රතික්ෂේප කළා.
මෙම නඩු විභාගය පැවැත්වූ ඊයේ දින තෙක් පමණක් විදුලිය කප්පාදු නොකිරීමට විදුලිබල මණ්ඩලය ලබා දී තිබූ ප්‍රතිඥාව දීර්ඝ කරන ලෙසට ශ්‍රී ලංකා මානව හිමිකම් කොමිසම ඉල්ලීමක් කළා.
කෙසේ වෙතත් විදුලිබල මණ්ඩලයේ පාර්ශවයේ අධිකරණයේදී එය ප්‍රතික්ෂේප කළා. ඒ අනුව ඊයේ දින සිට විදුලි කප්පාදුව යළිත් ක්‍රියාත්මක වුණා.
පැය දෙකයි මිනිත්තු විස්සක කාලයක් සඳුදා දක්වා මෙම විදුලි කප්පාදුව සිදු කරන බවයි විදුලිබල මණ්ඩලය පවසන්නේ. කෙසේ වෙතත් මහජන උපයෝගීතා කොමිසමේ සභාපති ජනක රත්නායක ප්‍රකාශ කරන්නේ උසස් පෙළ විභාගයට පෙනී සිටින සිසුන්ගේ පහසුව සඳහා පෙබරවාරි දහසය දක්වා විදුලි කප්පාදුවක් සිදු නොකරන ලෙසට මහජන උපයෝගීතා කොමිසම විසින් විදුලිබල මණ්ඩලයට ලිඛිතව දන්වා ඇති බවයි.
