විශේෂ කාර්ය බලකාය ගෝනහේන කඳවුරේ නිලධාරීන්ට ලද තොරතුරකට අනුව නිලධාරීන් කණ්ඩායමක් විසින් මිණුවන්ගොඩ පොලිස් වසමේ අංක 613/8/ඒ, ගොල්ඩන් සිටි වත්ත, නිල්පනාගොඩ, වෑගොව්ව ලිපිනයේ දී වැටලීමක් සිදුකර තිබෙනවා.
එහි දී විදේශගතව සිටින සංවිධානාත්මක අපරාධකරුවන් සහ මත්ද්‍රව්‍ය ජාවාරම්කරුවන් දෙදෙනෙකු වන මනික්කුගේ නුරේෂ් සුපුන් දයාරත්න නොහොත් හීනටියන මහේෂ් සහ අවිශ්ක යන පුද්ගලයන්ගේ සමීපතමයෙකු වන වයස අවුරුදු 28 ක කටුවල්ලේගම පදිංචි සුදේශ් මධුශාන් නැමැති පුද්ගලයෙකු T56 වර්ගයේ ගිනි අවියක්, ඒ සඳහා යොදන උණ්ඩ 03 ක් සහිත උණ්ඩ ගැබ් එකක් ද සමග අත්අඩංගුවට ගෙන ඇත.
මෙම T56 ගිනි අවිය 2023.06.24 වන දින විශේෂ කාර්ය බලකායේ නිලධාරීන්ගේ වෙඩි ප්‍රහාරයකට ලක්ව මියගිය ගනිදු සදුමින විසින් 2023.06.17 වන දින මිනුවන්ගොඩ බොරගොඩවත්ත ප්‍රදේශයේ දී පුද්ගලයෙකුට වෙඩි තබා ඝාතනය කිරීම හා තවත් පුද්ගලයෙකුට තුවාල සිදුකිරීම සඳහා භාවිතා කරන ලද බවට තොරතුරු අනාවරණය වී ඇත.
එම වෙඩි තැබීමට සම්බන්ධ අනෙක් පුද්ගලයා වන ශ්‍රියන්ත සමන් කුමාර නොහොත් මාමා නැමැත්තා පසුගිය දා පිස්තෝල අවියක් හා හෙරොයින් සමග 2023.06.20 වන දින කුලියාපිටිය ඇඹව ප්‍රදේශයේ දී අත්අඩංගුවට ගන්නා ලදී.
මෙම T56 ගිනි අවිය බස්නාහිර හා දකුණු පලාත් වල සිදු වූ ඇතැම් වෙඩි තැබීම්වලදී භාවිතා කර ඇති බවට තොරතුරු අනාවරණය වෙමින් පවතී.
වැඩිදුර විමර්ශන කටයුතු සඳහා ගිනි අවිය ඇතුළු භාණ්ඩ හා සැකකරු කොළඹ අපරාධ කොට්ඨාශය වෙත භාර දී ඇත.
