රටේ සාමය හා ආරක්‍ෂාව තහවුරු කිරීම සඳහා පොලිසියට හා ත්‍රිවිධ හමුදාවට අවශ්‍ය සියලූ බලතල ලබාදී තිබෙන බව අග්‍රාමාත්‍ය රනිල් වික්‍රමසිංහ මහතා අද (14) දින කුලියාපිටියේ දී පැවසීය.
ප්‍රදේශ කිහිපයක ඇතිවූ නොසන්සුන්තාවය සමනය කිරීම සඳහා ඊයේ (13) රාත්‍රියේ කැබිනට් මණ්ඩලය රැස්කොට ත්‍රිවිධ හමුදා ප්‍රධානීන් හා පොලිස්පතිවරයා සමඟ සාකච්ඡා කර මෙම පියවර ගත් බව වික්‍රමසිංහ මහතා පැවසීය.
අග්‍රාමාත්‍ය රනිල් වික්‍රමසිංහ මහතා මෙම අදහස් පළ කළේ අද (14) දින පෙරවරුවේ කුලියාපිටිය ප්‍රදේශයේ වත්මන් තත්ත්වය පිළිබඳව සොයා බැලීම සඳහා එම ප්‍රදේශයේ සිදු කළ සංචාරයකින් අනතුරුව කුලියාපිටිය පොලිස් අධිකාරී කාර්යාලය ඉදිරිපිට දී මාධ්‍ය වෙත අදහස් දක්වමිනි.
අග්‍රාමාත්‍ය රනිල් වික්‍රමසිංහ මහතා අද හෙට්ටිපොළ මුස්ලිම් දේවස්ථානයට පැමිණ එහි වත්මන් තත්ත්වය පිළිබඳව නිරීක්‍ෂණය කිරීමෙන් අනතුරුව, කුලියාපිටිය සහ පඬුවස්නුවර ප්‍රදේශවල සංචාරය කළේය.
සාමය ආරක්‍ෂා කර ගනිමින් ඉදිරි වැඩකටයුතු දියත් කිරීම සම්බන්ධව මහා සංඝ රත්නය, දේශපාලනඥයින්, ප්‍රදේශවාසී නියෝජිතයින් සහ ආරක්‍ෂක අංශ නිලධාරීන් සමග විශේෂ සාකච්ඡාවක් ද කුලියාපිටිය පොලිස් අධිකාරී කාර්යාලයේ දී පැවැත්විණි.
එහිදි වැඩිදුර අදහස් දැක්වු අග්‍රාමාත්‍යවරයා,
“වත්මන් තත්ත්වය සොයා බැලීම සඳහා අද අපි කුලියාපිටිය ප්‍රදේශයට පැමිණියා. ත්‍රස්තවාදීන්ගේ ක්‍රියාකාරකම් නිසා පාස්කු ඉරිදා දේව මෙහෙයන් කඩාකප්පල් වුණා. නමුත් මේ ප්‍රදේශවල සිටින ඇතැම් කඩාකප්පල්කාරී කණ්ඩායම් නිසා එළඹෙන වෙසක් උත්සවයත් විනාශ කිරීමට ඉඩදිය නොහැකියි.
ඒ වෙනුවෙන් ගතයුතු සියලූ ක්‍රියාමාර්ග ගැනීමට ඊයේ පැවැති අමාත්‍ය මණ්ඩල හමුවේ දී අපි තීරණය කළා.
රටේ සාමය හා ආරක්‍ෂාව තහවුරු කිරීමට පොලීසියට සහ ත්‍රිවිධ හමුදාවට අවශ්‍ය සියලූ බලතල ලබාදී තිබෙනවා. ත්‍රිවිධ හමුදා ප්‍රධානීන් සහ පොලිස්පතිතුමා ඒ පිළිබඳව ඊයේ ප්‍රකාශ නිකුත් කළා.
අසරණ ජනතාවට කරදර හිරිහැර කරමින් වෙසක් උත්සවය කඩාකප්පල් කිරීමට අපි කිසි ලෙසකින්වත් ඉඩ ලබාදෙන්නේ නැහැ.
අවශ්‍ය ප්‍රදේශවලට පොලිස් ආරක්‍ෂාව ලබාදෙමින් වෙසක් උත්සවය සාමකාමීව සැමරීමට අවශ්‍ය කටයුතු සලසනවා.
ඒවෙනුවෙන් පොලිසියටත් ත්‍රීවිධ හමුදාවටත් සම්පූර්ණ සහයෝගය ලබාදෙන්න යැයි මම ජනතාවගෙන් ඉල්ලා සිටිනවා.
මෙම සිදුවීම්වලින් හානියට පත්ව සිටින ජනතාවට සහන සැලසීම පිළිබඳව ඇමැති මණ්ඩලයේ දී අවශ්‍ය තීරණ ගැනීමට බලාපොරොත්තු වෙනවා.”
