යුක්‍රේන රුසියා යුධ ගැටුමට අදට දින 581 යි.
අමෙරිකාවේ වත්මන් ණය කෙටුම්පත යටතේ යුක්‍රේනයට කිසිඳු ආධාරයක් ඇතුළත් කර නැති වීම මේ වන විට කාගේත් අවධානයට ලක්ව තිබෙනවා.
එසේ වුවහොත් තවත් මාස දෙකකට ප්‍රමාණවත් යුධ උපකරණ පමණක් අමෙරිකාවෙන් යුක්‍රේනයට ලැබෙනු ඇතැයි විදෙස් මාධ්‍ය වාර්තා කරනවා.
යුක්‍රේනය සඳහා වන අමෙරිකානු සහයෝගය මැකී යන බවට ගොඩනැගෙමින් තිබෙන විවිධ කතා හමුවේ ජනපති ජෝ බයිඩ්න් නේටෝව සහ යුරෝපා සංගමය ඇතුළු මිත්‍ර පාර්ශවීය රටවල නායකයින් සමඟ දුරකතන සංවාද පවත්වා තිබෙන බව ධවල මන්දිරය ප්‍රකාශ කළා.
එහිදී යුක්‍රේනයට අඛණ්ඩව සහය දැක්වීම කිසිසේත්ම නතර කල යුතු නැති බව බයිඩ්න් අවධාරණය කර තිබුණා.
මේ අතර රුසියානු ආරක්ෂක අමාත්‍ය සර්ජි ෂොයිගු පවසන්නේ 2025 වසර දක්වා තම රට යුද්ධයට සූදානම් බවයි.
ලබන වසරේ රුසියානු අයවැයෙන් ජාතික ආරක්ෂාවට ඩොලර් බිලියන 109 කට වැඩියෙන් යොදවන බවයි.
2021 වසරේ එනම් යුද්ධය ආරම්භ වීමට පෙර ජාතික ආරක්ෂක වියදම් සමස්ථ වියදමෙන් 14.4%ක් වුණා.
එය ඩොලර් බිලියන 36ක් වනවා.
නමුත් ලබන වසරේ සමස්ථ අයවැයෙන් ජාතික ආරක්ෂාවට වැඩි මුදලක් වෙන් කිරීමට රුසියානු බලධාරීන් කටයුතු කර තිබෙනවා.
තවද සර්ජි ෂොයිගු පවසන්නේ මෙම වසර ආරම්භයේ සිටම හමුදා සේවයට පුද්ගලයින් 335,000 බඳවාගෙන ඇති බවයි.
ගෙවුණු සැප්තැම්බර් මාසයේ දී පමණක් හමුදාවට බැඳී ඇති සංඛ්‍යාව 50,000ක් බව ඔහු වැඩිදුරටත් ප්‍රකාශ කළා.
