පක්ෂ පාලනය පිළිබඳ චීන කොමියුනිස්ට් පක්ෂ මධ්‍යම කාරක සභාවේ තීරණය සම්බන්ධයෙන් චීන ජනපතිගෙන් පැහැදිලි කිරීමක්

“පූර්ණ හා දැඩි විනයකින් යුතුව පක්ෂ පාලනය අඛණ්ඩව ඉදිරියට ගෙන යාමට අදාළ ප්‍රධාන කරුණු රැසක් පිළිබඳ චීන කොමියුනිස්ට් පක්ෂ මධ්‍යම කාරක සභාවේ තීරණය” කෙටුම්පත් කිරීම සම්බන්ධයෙන් චීන ජනාධිපති ෂී ජින්පිං චීන කොමියුනිස්ට් පක්ෂයේ 20වැනි මධ්‍යම කාරක සභාවේ පස්වැනි පූර්ණ සැසිය වෙත පැහැදිලි කිරීමක් සිදු කර ඇත.
මෙම පූර්ණ සැසිය පූර්ණ හා දැඩි විනයකින් යුතුව පක්ෂ පාලනය අඛණ්ඩව ඉදිරියට ගෙන යාම කෙරෙහි අවධානය යොමු කිරීමට චීන කොමියුනිස්ට් පක්ෂයේ මධ්‍යම කාරක සභාවේ දේශපාලන කාර්යාංශය තීරණය කළේය. පක්ෂයේ දියුණු ස්වභාවය සහ පාරිශුද්ධභාවය පවත්වා ගැනීමටත්, පක්ෂයේ දිගුකාලීන පාලනය තහවුරු කිරීමටත් එය අතිශයෙන් වැදගත් බව ෂී ජින්පිං පැවසීය. එමෙන්ම පක්ෂය තුළ සමගිය මෙන්ම සමස්ත පක්ෂය, හමුදාව සහ මහජනතාව අතර ශක්තිමත් බැඳිමක් තහවුරු කිරීමට එය අත්‍යවශ්‍ය වේ. පක්ෂයේ මෙහෙවර ඉටු කිරීමටත්, පක්ෂයේ සහ ජාතියේ තිරසර සංවර්ධනය ප්‍රවර්ධනය කිරීමටත් එය ඉවහල් වන බව ද ඔහු සඳහන් කළේය.
එම තීරණය කෙටුම්පත් කිරීමේදී වැදගත් අංග පහක් සඳහා ප්‍රමුඛතාවය ලබා දුන් බව ෂී ජින්පිං පෙන්වා දුන්නේය. පළමුව, නව යුගයේ පක්ෂ සංවර්ධනය පිළිබඳ චින්තනය පූර්ණ ලෙස ක්‍රියාත්මක කිරීම. දෙවනුව, නව යුගයේ නව ගමනක පක්ෂයේ මෙහෙවර ඉටු කිරීම. තෙවනුව, දැඩි විනය තහවුරු කිරීම. සිව්වනුව, ප්‍රධාන ගැටලු හා ඉස්මතු වන ප්‍රශ්න කෙරෙහි අවධානය යොමු කිරීම. පස්වනුව, පද්ධතිමය දැක්ම ශක්තිමත් කිරීමය.
එම තීරණ කෙටුම්පතේ මූලික රාමුව සහ ප්‍රධාන අන්තර්ගතය පිළිබඳව ද ෂී ජින්පිං පූර්ණ සැසිය වෙත පැහැදිලි කළේය.