වයඹඇළ ව්‍යාපෘතිය කඩිනම් කරන්නැයි, අගමැතිගෙන් උපදෙස්

මොරගහකන්ද ජලාශ ව්‍යාපෘතිය යටතේ ඉදි කෙරෙන වයඹ පළාත් ඇළ ව්‍යාපෘතිය කඩිනම් කරන්නැයි, අග්‍රාමාත්‍ය මහින්ද රාජපක්ෂ මහතා නිලධාරීන්ට උපදෙස් දුන්නේ ය.

 

අග්‍රාමාත්‍ය මාධ්‍ය ඒකකය සඳහන් කළේ, මෙම ඇළ මාර්ගයේ ඉදිකිරීමත් සමග වයඹ පළාතේ යළ – මහ දෙකන්නයේම ගොවි බිම් හෙක්ටයාර් 12,500 ක් පෝෂණය කළ හැකි බවයි.

කුරුණෑගල, මොරගොල්ලාගම , සියඹලන්ගමුව වැව් තාවුල්ලේදී අග්‍රමාත්‍යවරයාගේ ප්‍රධානත්වයෙන් ඊයේ(22) දින ජනතා හමුවක් පැවැත්විණ.

එහිදී ව්‍යාපෘතියේ වාර්තාව අග්‍රාමාත්‍යවරයා වෙත ඉදිරිපත් කිරීමෙන් අනතුරුව සාකච්ඡාවක ද නිරත වූ බව අග්‍රාමාත්‍ය මාධ්‍ය ඒකකය සඳහන් කළේ ය.

වයඹ පළාත් ඇළ ව්‍යාපෘතිය ඔස්සේ කුඩා වැව් 350 ක් , මහ වැව් 08 ක් පෝෂණය වන අතර මේ යටතේ ඉදිවන හක්වටුනා ජලාශය යටතේ හෙක්ටයාර් 2500 ක් අස්වැද්දීමට නියමිතයි.

උග්‍ර පානීය ජල ගැටලුවකට විසඳුම් ලබාදෙමින් වකුගඩු රෝග ගැටලුවට පිළියම් සෙවීම සහ නව රැකියා උත්පාදනය මෙන්ම අලි මිනිස් ගැටුම අවම කිරීම ඇතුළු ප්‍රතිලාභ රැසක් ද මෙම ව්‍යාපෘතිය හරහා ජනතාවට ලැබෙනු ඇති.