මෙරට කොරෝනා රෝගීන් ගණන 4459 දක්වා ඉහළට

මේ වන විට මෙරට සමස්ථ කොවිඩ් නයින්ටීන් රෝගීන් සංඛ්‍යාව 4459 දක්වා ඉහළ ගොස් තිබේ.

 

ඊයේ(07) දිනයේ මිනුවන්ගොඩ ඇඟලුම් කර්මාන්ත ශාලාව ආශ්‍රිත කොරෝනා පොකුරේ වාර්තා වී ඇති සමස්ථ ආසාදිතයින් සංඛ්‍යාව 1034 දක්වා ඉහළ ගොස් තිබේ.

රජයේ ප්‍රවෘත්ති දෙපාර්තමේන්තුව සඳහන් කළේ එම පොකුරෙන් වාර්තා වු රෝගීන් 202ක් වාර්තා වූ අතර එම රෝගීන් 202 අතුරින් රෝගීන් 199 දෙනෙකු අදාළ ඇඟලුම් කර්මාන්ත ශාලාවේ සේවකයින් බවයි.

අනෙක් කොවිඩ් නයින්ටීන් රෝගීන් තිදෙනා එම කාර්යාල මණ්ඩල සාමාජිකයින්ගේ ආශ්‍රිතයින් බව වන අතර ඊයේ දිනයේ දී තවත් කොවිඩ් නයින්ටීන් රෝගීන් පස් දෙනෙකු හඳුනාගෙන තිබේ.

එම රෝගීන් පස් දෙනා අතර රුසියාවේ සිට පැමිණි පුද්ගලයින් තිදෙනෙකු සහ ඉන්දියානු ජාතික නාවිකයින් දෙදෙනෙකු සිටින බව රජයේ ප්‍රවෘත්ති දෙපාර්තමේන්තුව සඳහන් කළේය.

ඉන් රෝගීන් 3274ක් පූර්ණ සුවය ලබා රෝහල්වලින් පිටව ගොස් ඇති අතර රෝගීන් 1172ක් රෝහල්ගතව ප්‍රථිකාර ලබන බව සෞඛ්‍ය අමාත්‍යාංශය සඳහන් කළේය.

මේ අතර කොළඹ, කාසල් වීදිය කාන්තා රෝහලේ සිටි ගැබිණි මවකට ද කොවිඩ් නයින්ටීන් ආසාදනය වී ඇති බවට තහවුරු වී තිබේ.

ගම්පහ මීරිගම ප්‍රදේශයේ පදිංචිව සිටින 28 හැවිරිදි කාන්තාවකට මෙලෙස වෛරසය ආසාදනය වී ඇති බවට තහවුරු වූ බව කාසල්වීදිය කාන්තා රෝහලේ අධ්‍යක්ෂ වෛද්‍ය ප්‍රදීප් විජේසිංහ මහතා සඳහන් කළේය.

අදාළ කාන්තාව මේ වන විට මුල්ලේරියාව රෝහල වෙත මාරු කර හැරීමට කටයුතු කළ බව ද රෝහල් අධ්‍යක්ෂවරයා පැවසීය.